Betohen 8 prokurorët e parë të SPAK/ Në presidencë i pranishëm dhe Ruçi, mungoi Dvorani (Ceremonia mbahet larg syrit të medias)

Është kryer ceremonia e betimit të 8 prokurorëve të rinj të SPAK në ambientet e presidencës.

Betimi është kryer pa praninë e kamerave të mediave, ndërkohë që prej ditës së sotme SPAK do të jetë funksionale, dhe do të nisë nga puna për hetimin e krimit dhe të korrupsionit, deri në nivelet më të larta.

8 prokurorët e parë të SPAK-ut janë: Elida Kaçkini, Enkeleda Millonaj, Edvin Kondili, Behar Dibra,  Arben Kraja, Klodian Braho, Ened Nakuçi dhe Altin Dumani.

3 prej anëtarëve të rinj të SPAK-ut, Altin Dumani, Arben Kraja dhe Edvin Kondili janë në garë dhe për kreun e kësaj strukture të re që është ngritur, dhe që ka marrë mbështetjen e përfaqësive diplomatike në vendin tonë.

Në ceremoninë e betimit ishin të pranishëm edhe Kryetari i Kuvendit Gramoz Ruçi, Avokati i Popullit Erinda Ballanca, Anëtarja e Gjykatës Kushtetues Vitore Tusha, Kryetarja e Këshillit të Lartë Gjyqësor Naureda Llagami, Kryetari i Këshillit të Lartë të Prokurorisë, Gent Ibrahimi, Ambasadori i Delegacionit të Bashkimit Europian, Luigi Soreca, përfaqësues të Ambasadës së Shteteve të Bashkuara të Amerikës, të OPDAT-it, misionit EURALIUS V dhe anëtarët e KLP-së.

Njoftimi i presidencës:

Në Institucionin e Kryetarit të Shtetit u zhvillua sot ceremonia solemne e betimit para Presidentit të Republikës, Sh.T.Z. Ilir Meta, të tetë anëtarëve të Prokurorisë së Posaçme kundër Korrupsionit dhe Krimit të Organizuar: znj. Elida Kaçkini, znj. Enkeleda Millonaj, z. Edvin Kondili, z. Behar Dibra, z. Arben Kraja, z. Klodian Braho, z. Ened Nakuçi dhe z. Altin Dumani.

Pas ekzekutimit të himnit kombëtar dhe leximit të vendimeve të Këshillit të Lartë të Prokurorisë, duke vendosur dorën mbi Kushtetutën e Shqipërisë, prokurorët u betuan para Presidentit Meta: “Betohem solemnisht se gjatë kryerjes së detyrës do t’i qëndroj kurdoherë besnik Kushtetutës së Republikës të Shqipërisë, ligjeve në fuqi dhe do të respektoj rregullat e etikës profesionale!”

Presidenti i Republikës u uroi suksese dhe punë të mbarë prokurorëve të Prokurorisë së Posaçme kundër Korrupsionit dhe Krimit të Organizuar.

Në ceremoni e betimit ishin të pranishëm edhe Kryetari i Kuvendit Gramoz Ruçi, Avokati i Popullit Erinda Ballanca, Anëtarja e Gjykatës Kushtetues Vitore Tusha, Kryetarja e Këshillit të Lartë Gjyqësor Naureda Llagami, Kryetari i Këshillit të Lartë të Prokurorisë, Gent Ibrahimi, Ambasadori i Delegacionit të Bashkimit Europian, Luigi Soreca, përfaqësues të Ambasadës së Shteteve të Bashkuara të Amerikës, të OPDAT-it, misionit EURALIUS V dhe anëtarët e KLP-së.