Numrit të viktimave nga koronavirusi në Shqipëri i është shtuar sot edhe arkitekti i njohur Durrsak, Hajdar Kovaçi. I ndjeri që ka humbur betejën me Covid-19 ishte prej 24 ditësh i intubuar në spital, por nuk mundi të mbijetojë.
Lajmin për vdekjen e 73-vjeçarit e ka bërë Ministria e Shëndetësisë ku njoftoi se sot ka humbur jetën në spitalin ‘Shefqet Ndroqi’, ose siç njihet ndryshe Sanatoriumi arkitekti i njohur.
Njoftimi i Ministrisë së Shëndetësisë
“Një pacient 73-vjeçar, i konfirmuar me COVID19, i intubuar prej 24 ditësh ka ndërruar jetë në spitalin “Shefqet Ndroqi” mbrëmjen e sotme. Pacienti 73-vjeçar me inicialet H.K., nga Durrësi ishte prej thuajse 1 muaji në gjendje të rëndë, me Insuficience respiratore akute.
73-vjeçari vuante nga pneumonia bilaterale, detres i rëndë respirator (ARDS), me sëmundje bashkëshoqëruese Talasemi Minor dhe Hipertension Arterial. Megjithë pëpjekjet e jashtëzakonshme të stafit mjekësor në terapinë intensive, 73-vjeçari nuk arriti të mbijetojë.
Ministria e Shëndetësisë dhe Mbrojtjes Sociale u shpreh ngushëllimet familjeve të të ndjerit dhe apelon qytetarët t’i respektojnë me shumë rigorozitet masat e distancimit fizik, pasi janë përcaktuese për frenimin e përhapjes së COVID-19. 29 qytetarë nuk e kanë fituar dot betejën me COVID19, pavarësisht përpjekjeve të stafeve mjekësore të spitaleve COVID”.
Discussion about this post