Ka nisur shembja e kompleksit teatror në qendër të Tiranës, ndërkohë që kjo ka ndodhur pas ndërhyrjes me forcë të qindra efektivëve të policisë ku janë përleshur me aktorët dhe aktivistët.
Gazetarët e Fax News në terren raportojnë se situata është alarmante ndërkohë që mes të arrestuarve është edhe aktori, Neritan Liçaj dhe emra të tjerë që prej 2 vitesh nuk kanë lejuar shembjen e godinës së Teatrit Kombëtar.
Policia ka ndërhyrë pas qetësimit të situatës në orët e para të mëngjesit, kur edhe disa nga protestuesit ishin larguar e ata që ndodheshin aty janë gjendur përballë një ndërhyrjeje “Hollivudiane” të efektivëve të maskuar, të ngjeshur me njëri-tjetrin e të dhunshëm.
Kauza e Teatrit Kombëtar e cilësuar si “Kauza e Demokracisë” (për shkak se prej 2 vitesh e 3 muajsh qëndronte dhe i kishte berë ballë çdo presioni, tentative apo ligjeve të miratuara në mesnatë, ndryshe nga protesta të tjera ku të gjithë e dimë se si kanë përfunduar), ra.
Kalimi në pronësi të Bashkisë së Tiranës me VKM të truallit dhe godinës së Teatrit Kombëtar rreth një javë më parë, rezultoi si vula përfundimtare për fatin e tij.
Sot kryeqyteti por edhe Shqipëria ka një aset historik më pak dhe qeveria një “triumf” më shumë, i fituar me dhunë, mungesë të transparencës, madje edhe të dritës së natyrës pasi siç shpesh ka ndodhur, beteja e saj ishte po në errësirë e mungesë të vigjilencës së qëndrestarëve.
Teatri Kombëtar ka nisur të shembet e bashkë me ta një kauzë për demokracinë, teksa vështirë të shpresohet se një kauza mund të qëndrojë pa njerëz, e njerëz mëngjesin e sotëm në atë shesh ishin diçka më shumë se mbrëmjet e zakonshme kur artistët e aktivistët mblidheshin për të treguar kundërshtinë ndaj vendimit të pushtetit.
Megjithatë, ngjarja e mëngjesit të sotëm është, dhe me shumë gjasë do të mbetet gjatë në kujtesën e shoqërisë shqiptare si rënie e diçkaje dhe ngritja e diçkaje tjetër, ku pushteti shfaqet më i fortë se qytetari ndërsa për demokraci e se si duhej të ishte ajo, ka për të folur e ardhmja. (F.GJ/FAXWEB.AL)
Discussion about this post