Ministri i Financave Arben Ahmetaj, në seancën e sotme plenare u shpreh ashpër kundër qeverisë paraardhëse, pasi sipas tij nuk i ka mbështetur qytetarët por e ka lënë vendin në një situatë të falimentuar ekonomike.
Lidhur me buxhetin e ri, aq shumë të kritikuar nga Partia Demokratike, ai u shpreh se është buxheti më i madh që ka patur Shqipëria, dhe mbi të gjitha është buxheti i konsumit.
Sipas tij, opozita e ka kundërshtuar aq shumë buxhetin dhe taksën progresive pasi kjo ka qënë pika më e fortë e ardhjes në pushtet të Partisë socialiste.
“Kanë tmerr nga taksat progressive, kjo sepse ishte flamuri ynë i betejes. Kush fiton më shumë paguan më shumë e kush fiton më pak paguan më pak. Me aplikimin e këtij sistemi, 97% e shqiptarëve përfituan ulje massive të taksave. Vetëm me këtë taksë ne kemi kthyer mbrapsht 440 milionë dollarë.”, u shpreh Ahmetaj gjatë seancës plenare.
Sipas ministrit, nëse demokratët kthehen në pushtet, çdo qytetar do të paguajë 120 milion dollarë taksa.
“1 votë për ta është 120 milionë dollarë nga xhepi i klasës së mesme.”, shtoi ai.
Për Ahmetajn taksa progresive ka ulur barrën e 423 mijë punonjësve me taksa nga 0-140 mijë lekë të reja.
