Tinka Kurti, aktorja e madhe shqiptare sot ka ditëlindjen. Në këtë ditë të rëndësishme të jetës së saj, pas gjithë kontributit për artin dhe atdheun, kur mbush 84 vjeç, shkrimtarja Flutura Açka bën rrëfimin që e nis me fjalët ”Atdheu të rri i ngushtë Tinka Kurti”, duke e uruar nga zemra.
URIMI I FLUTURA AÇKËS:
”Ty Atdheu të rri i ngushtë, Tinka Kurti, si të gjithë artistëve që magjepsin. Rrallë më ka ndodhur të takoj te një grua shqiptare t’i ketë bashkë të gjitha, ato me të cilat të ka bekuar jeta. Ti nuk u lodhe së qeni e përkryer. Nga të paktat që na kanë mbetur dhe për të cilat dikur do të themi… “ne kishim ca zonja që na emancipuan në kohëra të errëta, por që nuk u shitën as në kohëra të turbullta tranzicioni”. Ti nuk je më jotja, ndaj marr kurajën të ta uroj publikisht ditëlindjen!
“Ndigjo, zemër, në varrimin e Fishtës… ” dhe rrëfimi i Tinka Kurtit vazhdon me të tilla detaje, që vetëm gra mahnitëse si ajo dinë. Dhe unë, shkrimtarja, tutem a mundem t’i shkruaj historitë, siç ti di të rrëfesh?
