Detektivë britanikë të Agjencisë Kombëtare të Luftës kundër Krimit kanë bastisur disa banesa në qytetin e Lutonit, në veri të Londrës dhe kanë arrestuar 4 shqiptarë të dyshuar se trafikonin emigrantë nga Belgjika në Britani.
Katër shqiptarët, të moshës nga 28 deri në 41 vjeç, janë arrestuar në bazë të urdhrave europianë të arrestit. Pjesë e operacionit policor, i cili dukshëm është një bashkëpunim me autoritetet belge, është edhe arrestimi i njëkohshëm i katër shqiptarëve të tjerë në qytetin Gent të Belgjikës, nga Policia Federale belge.
Dyshohet se ky rrjet i trafikantëve përmes pagesave sillte çdo javë në Britani rreth 20 emigrantë nga Shqipëria.
Të 4 të arrestuarit kanë dalë përpara Gjykatës së Ekstradimeve, Westmintser Magistrates Court, në Londër dhe pritet të ekstradohen së shpejti drejt Belgjikës.
