Kambana alarmi te Vllaznia, ka urdhër për falimentin e klubit. Raporti i auditit të Kontrollit të Lartë të Shtetit, që nxori në pah shkeljet që janë bërë në klubin shkodran, nuk është i vetmi lajm jo i mirë për kuqeblutë.
Duket se gjithçka ka nisur nga një shkresë që organizata “Intelektualët e Rinj Shpresë” ka dërguar në Drejtorinë Rajonale të Tatimeve. Kjo organizatë ka kërkuar informacion, përmes një shkrese zyrtare, në lidhje me nisjen e procedurave për shpalljen e falimentit për “Vllaznia sh.a”, duke qenë se ky subjekt është me humbje dhe, sipas ligjit, duhet që të nisë shpallja e falimentit.
IRSH nuk ka marrë një përgjigje në afatin e caktuar dhe kjo çështje nuk është lënë me kaq, pasi është dorëzuar një tjetër shkresë kësaj radhe në Ministrinë e Financave.
SHKRESA
Sipas shkresës që mban firmën e sekretares së përgjithshme, Gelardina Prodani, është drejtoria e përgjithshme e politikave makroekonomike dhe çështjeve fiskale në Ministrinë e Financave, e cila i ka dërguar një shkresë drejtores së përgjithshme të tatimeve, Vasilika Vjero. Në këtë shkresë, sipas ligjit, duhet që të nisë procedura e falimentit për Vllaznia sh.a nga administrata tatimore.
Konkretisht në këtë dokument zyrtar, citohet: “IRSH ka depozituar pranë Ministrisë së Financave një kopje të raportit të dytë mbi transparencën në Bashkinë Shkodër, ku në fokus është transparenca te Vllaznia sh.a. Në vijim të këtij raporti, ndër të tjera, kjo shoqatë ka përcjellë kërkesën e saj që administrata tatimore të kërkojë pranë gjykatës fillimin e procedurave të falimentit për Vllaznia sh.a.
Sikurse përcaktohet sipas ligjit, fillimi i procedurave për shpalljen e falimentit të Vllaznia sh.a, ju lutem të bëni trajtimin e çështjes së ngritur nga IRSH në përputhje sa parashikon legjislacioni tatimor, duke informuar Ministrinë e Financave në afat kohor sa më të shkurtër”, bën të ditur shkresa drejtuar drejtorisë së tatimeve.
Tashmë Vllaznia rrezikon më shumë se kurrë, duke qenë se kërkohet edhe zyrtarisht që të nisin procedurat për shpalljen e falimentit dhe, në rast se kjo ndodh, kuqeblutë shkojnë direkt në kategorinë më të ulët të futbollit shqiptar. Mbetet për t’u parë se çfarë do të ndodhë…
Discussion about this post