Albana Vokshi padit në SPAK kryeministrin Rama, Veliajn dhe Manastirliun: Kanë fyer qytetarët e Tiranës me ‘asfalt elektoral’

Ish deputetja e partisë Demokratike, Albana Vokshi ka paditur sot në SPAK, kryeministrin Edi Rama, kryetarin e bashkisë së Tiranës, Erion Veliajn, ministren e Shëndetësisë Ogerta Manastirliu dhe deputetin Ulsi Manja.

Sipas Vokshit, partia socialiste po bën një krim duke u munduar të mashtrojë qytetarët me ‘asfalt elektoral’ vetëm dy javë para zgjedhjeve.

Kandidatje për deputete e PD, ka inspektuar rrugët e asfaltuara së fundmi në njësinë nr 9 në Tiranë të cilat sipas saj nuk kanë asnjë lloj projektimi dhe asnjë lloj cilësie për rrugët duke bërë që të ketë probleme me kanalizimet në të ardhmen.

‘I kam bërë thirrje SPAK që të fillojë hetimet për zyrtarët e lartë të partisë socialiste për abuzimet që bëjnë në prag të zgjedhjeve.

Puna është bërë natën, tek një rrugë tjetër asfalti është prishur brenda një jave. Ky është asfalt elektoral, pa asnjë projekt të mirëfilltë. Ky është një truk elektoral i Edi Ramës, Erion Veliaj dhe Ogerta Manastriliut.’- u shpreh Albana Vokshi.