Katër ditë më parë në emisionin “Jeta në Kosovë” të gazetares Jeta Xharra në RTK , kryetari i Vetëvendosjes, Albin Kurti u shpreh për tarifën e Rrugës së Kombit, duke thënë se kryeministri Rama nuk mund të zgjidhte kohë më të keqe për ta vendosur tarifën sesa pikërisht kjo kur Kosovës po i shtohen problemet me Serbinë.
“Ju e patë sesi kryeministri Haradinaj shumë më tepër pati fjalë të këqija për Ramën sesa për Vuçiçin.
E dyta mendoj që taksa është shumë e lartë kurse populli është përgjithësisht i varfër.
E treta, kjo po funksionon më shumë si gjobë për Kukësin dhe Kosovën, në vendin ku është vendosur pagesa e kësaj takse.” – u shpreh Kurti.
I pyetur nga gazetarja Xharra për planin e bashkimit kombëtar në rrethanat e reja të vendosjes së kësaj tarife, Kurti tha se duhet të gjendeshin zgjidhje të tjera.
“Në kuadër të këtyre mbledhjeve që po zhvillohen mes dy qeverive duhej të diskutohej kjo çështje dhe të gjendej një zgjidhje tjetër.
Fundja unë besoj shumë më mirë prej buxhetit të shtetit që mbushet prej taksave sesa prej xhepave të qytetarëve individual ku pesë euro do t’i paguajë edhe ai që kalon me ‘Golf 3’ edhe ai i cili kalon me keto automobilat luksozë të qeveritarëve.” – tha Albin Kurti në përfundim të fjalës së tij.
(E.L/Faxweb)
Discussion about this post