Autori i dyshuar për vrasjen e ish-kryekomisarit Artan Cuku, Mikel Shallari, ka dalë ditën e sotme përpara trupit gjykues në pritje të vendimit ndaj tij. Pas tërheqjes për të marrë vendimin, trupi gjykues vendosi “arrest me burg” për Mikel Shallarin.
Mësohet se Mikel Shallari ka deklaruar se nuk ka gjë për të thënë, duke preferuar të flasë një herë tjetër: “Nuk kam gjë për të thënë, do të flas një herë tjetër”.
Ndërkaq, Prokuroria e Krimeve të Rënda që ka kërkuar masën e sigurisë “arrest me burg” për Shallarin, ka zbuluar detajin që e tradhëtoi autorin e dyshuar.
“Policia sekuestroi në zonë rrobat e krimit. Gjurmët u gjetën në një kosh plehrash afër vendngjarjes. Ka përputhshmëri gjenetike 100% të gjurmëve të gjetura. Identifikimi u bë përmes profilit të ADN-së.
Mikel Shallari është arrestuar në Zvicër për trafik droge, të dhënat i kemi marrë nga Interpol Berna.”, ka bërë me dije Prokuroria, e cila ka zbuluar edhe pistat ku është përqëndruar hetimi.
Mësohet se çështja është duke u hetuar për “hakmarrje”, por edhe për “vrasje për shkak të detyrës” bazuar në aktivitetin e Artan Cukut, atë të shoqërisë së tij private të sigurisë.
(XH.A/SHUPLAKA)
