Historiani Paskal Milo i ftuar në emisionin “Arena” nga Dritan Hila në Rtv Ora News, se arrestimi i Ramush Haradinajt synon të godasë Kosovën.
“Kemi një synim të qartë të Serbisë, e cila vazhdon të luaj lojën e vet prej shumë vitesh. Në momentin aktual duket se ka një ngecje të procesit të negociatave midis Shqipërisë dhe Kosovës. Ramushi është një nga aktorët politikë të Kosovës por që kërkojnë ta keqpërdorin këtë rast për të goditur thelbin e asaj çka përfaqëson Kosova. Për të bërë një atentat tjetër të sovranitetit dhe të ardhmes së sigurt evropiane të Kosovës”, u shpreh Milo.
“Ky është kompromis i dhimbshëm i faktorit ndërkombëtar për të bërë balancime të panevojshme. Është një balancë ndaj gjykatës për ish-kriminelët e luftës në Jugosllavi në Hagë dhe tani po krijojnë një gjykatë speciale për Kosovën”, shtoi historiani dhe politikani Milo.
Gjykata franceze liroi sot me kusht kreun e AAK-së, Ramush Haradinaj. Sipas vendimit, Haradinaj duhet të paraqitet dy herë në javë tek autoritetet dhe të qëndrojë në territorin francez.
Serbia e kërkon Haradinajn nën dyshimin se ka kryer krime lufte në Kosovë në vitet 1998 dhe 1999, të cilat nuk i janë parashtruar Gjykatës Ndërkombëtare të Hagës, e cila e ka shpallur dy herë të pafajshëm ish-kryeministrin e Kosovës. (A.R/SHUPLAKA)
Discussion about this post