Arrestimi i Haradinajt, Vuçiç: Do kërkojmë ekstradimin, e palogjikshme nëse Franca s’zbaton ligjin

Kryeministri i Serbisë, Aleksandar Vuçiç, ka reaguar lidhur me arrestimin e kreut të AAK-së, Ramush Haradinaj. Në një deklaratë për mediat, ai u shpreh se është gjë e mirë që ligji është mbi politikën. Sipas tij, askush nuk ka të drejtë që të rrënojë vendimet e Serbisë.

“Prokuroria ka një numër të provave dhe gjërave inkriminuese dhe nuk do të donte që Franca si shtet serioz dhe me sundim të ligjit të mos veprojë në përputhje me ligjin por me qasje politike. Ne kemi një njeri me aq shumë vepra që nuk mund t’i numëroni të gjitha. Askush nuk ka të drejtë të dëmtojë vendimin e zyrës së prokurorit të pavarur”, është shprehur Vuçiç, raporton media serbe “B92”.

I pyetur nga gazetarët serbë nëse Serbia do të kërkojë zyrtarisht ekstradimin e Ramush Haradinajt, kryeministri serb u përgjigj: “Por çka tjetër do të bëjë?” (XH.A/SHUPLAKA)