“Arrestimi i Ilir Metës, torturë çnjerëzore”- Sali Berisha paralajmëron: Dosjen do ta çojmë në Hagë

Kreu i PD-së, Sali Berisha e ka konsideruar një torturë çnjerëzore publike mënyrën e arrestimit të ish-Presidentit të vendit, Ilir Meta.

Berisha u shpreh se do të përgatitet dosja për ta çuar në Hagë, teksa thekson se ” ishte një torturë publike, ishte një keqtrajtim çnjerëzor publik”.

Sali Berisha: Nuk ka dyshim që është krejtësisht proces politik. Por tani është bërë botërisht e njohur që ky institucion dhe drejtësia është një armë politike në duart e diktaturës.

E tillë është rasti yt, i tillë dhe shumë i rëndë është rasti ndaj Ervin Salianjit, rast të cilin ne do ta paraqesim në të gjitha instancat ndërkombëtare sepse ai është aty vetëm se guxoi të denoncojë mafien, të kryejë detyrën e tij, misionin e tij si deputet.

I tillë është rasti i kryetarit të Partisë së Lirisë. Ne duhet të përgatisim dosjen për në Hagë sepse është torturë çnjerëzore publike. Ne do punojmë me Partinë e Lirisë të dërgojmë dosjen në Komisionin Antitorturë në Këshillin e Europës dhe të ndjekim të gjitha instancat në OKB dhe kudo.