Arrestohet një 36-vjeçar në Sarandë i shpallur në kërkim për trafikim narkotikësh

Policia e Sarandës ka arrestuar një person të shpallur në kërkim për trafikim narkotikësh.

36-vjeçari Aleks Likaj, së bashku me shtetas të tjerë të organizuar si grup kriminal, trafikonin lëndë narkotike përmes kufirit të gjelbër me Greqinë.

Në bazë të informacioneve të siguruara nga inteligjenca policore u bë e mundur lokalizimi i Likajt dhe vënia e tij në pranga.

Njoftimi i Policisë:

Sarandë

Lokalizohet, kapet dhe vihet në pranga një 36-vjeçar i kërkuar në kuadër të megaoperacionit policor ndërkombëtar antidrogë të koduar “Brezi i Gjelbër”.

Megaoperacioni, i zhvilluar nga Policia e Shtetit dhe Policia e Greqisë, në vitin 2019, goditi një grup kriminal që trafikonte përmes kufirit të gjelbër me Greqinë, lëndë narkotike.

Shërbimet e Komisariatit të Policisë Sarandë, në vijim të punës gjurmuese dhe operacionale, për kapjen e shtetasve të shpallur në kërkim, në kuadër të operacioneve policore të zhvilluara më parë, si dhe në bazë të informacioneve të siguruara nga inteligjenca informative, kanë lokalizuar, kapur dhe ndaluar shtetasin e shpallur në kërkim kombëtar, Aleks Likaj, 36 vjeç, banues në Sarandë.

Në vitin 2019, Gjykata për Krimet e Rënda, Tiranë, i kishte caktuar shtetasit Aleks Likaj, masën e sigurisë “Arrest në burg”, për veprën penale “Trafikimi i narkotikëve”, kryer në formën e grupit të strukturuar kriminal. 36-vjeçari dhe shtetas të tjerë (të vënë në pranga gjatë megaoperacionit ndërkombëtar “Brezi i Gjelbër”), të organizuar si grup kriminal, trafikonin përmes kufirit të gjelbër me Greqinë, lëndë narkotike.

Materialet procedurale i kaluan Prokurorisë, për veprime të mëtejshme.