Nis gjyqi ndaj Ergys Kolaverit, i dyshuar si autor i atentatit me snajper në burgun e Vaqarrit ndaj Gazmir Dacit, të cilin e bënte përgjegjës për vrasjen e njërit vëlla dhe plagosjen rëndë të tjetrit.
Seanca e sotme zgjati vetëm pak minuta, pasi kushëriri i tij, Enea Ceka, i akuzuar për moskallëzim krimi, i cili është hetuar në gjendje të lirë, nuk ishte i pranishëm në sallë. Në këto kushte gjykata vendosi ta shtyjë seancën dhe urdhëroi policinë gjyqësore të njoftojë të pandehurin.
Ergys Kolaveri akuzohet për atentatin në pasditen e 30 korrikut të 2016-ës ku i pandehuri organizoi një atentat ndaj Gazmir Dacit, i cili ndodhej në burgun e Vaqarrit në pritje të gjykimit.
Prokuroria thekson se Kolaveri i pajisur me një armë të sofistikuar snajper ishte vendosur në një distancë të largët në ambjentët e jashtme të burgut dhe priti derisa Gazmir Daci doli në ajrim.
Plani për të marrë gjakun e vëllait, nuk shkoi si duhet pasi nuk mundi ta vrasë atë që e konsideronte si hasmin e tij, por la të plagosur një të paraburgosur, shtetas i kosovës. Më pas atentatori u largua me shpejtësi me një makinë tip “Benz”.
(S.SH/SHUPLAKA)
