Revolta e banorëve të Zall Herrit i ka nxjerrë sërish në rrugë të madhe për të protestuar, pasi shqetësimet e mëparshme të tyre nuk kanë marrë një zgjidhje.
Problemi që ata tregojnë për mediat, është te aktiviteti i guroreve që veprojnë në zonë.
Sipas tyre, situata është bërë tepër e vështirë, ku prej kohësh thonë se kanë pasur probleme dhe me ujin e pijshëm, i cili është i turbullt. Në lidhje me këtë, autoritetet kanë thënë se një arsye që turbullohet uji, mund të jetë shiu, megjithatë, uji vazhdon të mbetet i turbullt dhe në ditët kur nuk ka pasur asnjë reshje.
Janë kamionët, të cilët transportojnë inertet një nga shkaqet e këtij degradimi në zonë, shprehen protestuesit, ku i bëjnë thirrje deputetit Xhemal Qefalisë që të japë llogari për këtë situatë.
Banorët e Zall Herrit ndodhen mes këtyre problemeve, ndonëse ende nuk kanë marrë një zgjidhje.
Dy gjëra kërkojnë ata, një rrugë optimale që mundëson lëvizjen me lehtësi dhe sigurisht ujë të pijshëm. Për këtë ata kërkojnë një reagim të menjëhershëm të autoriteteve.
Një nga banorët: Në maj deputeti ishte për fushatë këtu dhe nuk flet. Njësia jonë vjen për të marrë lekët për ditë të hëne se ditë të tjera nuk vijnë në punë. Do rrimë këtu deri sa të zgjidhet problemi. Këtu jetojnë njerëz. Duam ujë dhe rrugë, dy çështje themelore. Ata thanë se turbullohet nga shiu, po sot që s’ka shi pse është i turbullt uji? Të gjithë këtë problem po e krijojnë kamionët. Nuk ka pasur asnjë reagim. Ka ardhur vetëm deputeti i zonës, kemi bërë një takim.
Një e moshuar thotë: I bëjmë thirrje Xhemal Qefalisë, deputetit, që të vijë këtu dhe të japë llogari, ose të lërë mandatin. Ata në shtëpinë e tyre, e kanë marrë nga këtu ujin dhe kanë, kurse unë s’kam pikë uji. Ne ja dhamë votën Veliajt me na ndihmuar, por jo Edi Ramës dhe Qefalinë, që të bëjnë ç’të duan. Na ndihmoni!
Discussion about this post