Basha në Kukës: Nuk do lejojmë taksën në rrugën e kombit, asnjë investim në Kukës nga qeveria

Lulzim Basha u takua ditën e sotme me demokratët e Kukësit dhe kundërshtoi fort “taksën e Edi Ramës për Rrugën e Kombit”.

“Nuk mjafton fakti që nuk ka hapur një vend të ri pune në Kukës, nuk ka bërë një investim në Kukës. Por tani dëshiron t’i vendosë Kukësit një rrethim, një barrikadë, një mur në formën e taksës për Rrugën e Kombit”, u shpreh Basha.

“Pse duhet të paguajnë kuksianët taksë për Rrugën e Kombit? Pse duhet të paguajnë kuksianët taksë për Rrugën e Kombit kur secili prej nesh paguan 240 lekë shtesë taksë për karburantin që me ardhjen e Edi Ramës? Ne nuk do të lejojmë vendosjen e një takse që do të ndalojë qarkullimin e lirë midis Kukësit dhe Tiranës, midis Prishtinës dhe Tiranës”, tha kreu i PD-së.

Sipas Bashës kjo është rruga që e ndërtoi qeveria e mëparshme me kaq sakrificë e përpjekje, dhe do ta kemi jo vetëm Rrugën e Kombit por rrugën e kombit të lirë dhe rrugën e lirë të kombit për qytetarët dhe mallrat shqiptare, të Shqipërisë dhe Kosovës.

Basha tha se qeverisja aktuale degjeneroi në gjendjen e sotme sepse i braktisi qytetarët dhe e lidhi fatin e saj me krimin e me një grusht njerëzish e klientësh.

“Hallka e dobët është fakti se politikani me sistemin aktual nuk e ka të lidhur fatin e tij me qytetarin. Ka humbur çdo lidhje me realitetin sepse fatin e tij nuk e ka të lidhur më me qytetarët. Këtu duhet të ngulemi fort ne demokratët e të nxjerrim konkluzionet tona. Së pari, ne nuk mund të lejojmë kurrë që ne demokratët të humbim lidhjen me realitetin, të humbim lidhjet me qytetarët, të jetojmë një realitet që ska lidhje me hallet dhe problemet e tyre. Detyra jonë e parë është të jemi afër njerëzve, ti kuptojmë dhe ti prekim hallet që ata prekin në mënyrë të përditshme e të bëjmë gjithçka për tu ardhur atyre në ndihmë”, deklaroi Basha.