Kryetari i Partisë Demokratike, Lulzim Basha ka qenë në Shkodër, ku është takuar me punonjës të një kompanie për prodhim veshjesh.
Basha nëpërmjet një postimi në Facebook shkruan se sipërmarrje të tilla janë mundësi e mirë për punësimin e grave dhe të vajzave.
Lulzim Basha: Një bashkëbisedim i hapur me punonjësit dhe sipërmarrësin e kompanisë së prodhimit të veshjeve Melgushi sh.p.k, e krijuar në vitin 1993. Me kapacitet prodhues rreth 40.000 njësi në ditë, kompania më së shumti eksporton në tregun italian. Sipërmarrje të tilla janë një mundësi e mirë për punësimin e grave dhe vajzave në zona të ndryshme të vendit.
Megjithatë, janë disa faktorë sipas Bashës, të cilët kanë detyruar shkurtimin e stafeve, që nga rritja e taksave te kostot e prodhimit.
“Por, me rritjen e taksave, të faturave, të çmimit të naftës dhe të kostove të prodhimit, bizneset po përballen me vështirësi të mëdha. Shumë syresh janë detyruar të shkurtojnë numrin e punonjësve, madje disa prej tyre edhe kanë falimentuar”, shkruan Basha në Facebook.
Sipas kreut të PD-së, zgjidhja për këtë problem është mbështetja e kompanive duke ulur taksat dhe subvencionimi, gjë që do të sillte rritjen e pagave thotë Basha.
“Mbështetja për këto kompani, përmes uljes së taksave, që t’ju japë atyre mundësinë të rrisin pagat por edhe subvencionimi për punonjësit e rinj, është një kontribut për shtimin e të punësuarve dhe krijimin e kushteve për një jetë më të mirë për shumë familje, që sot nuk plotësojnë as nevojat jetike”, e mbyll duke thënë kryedemokrati.
(Xh.H/FaxWeb.al)
