Kreu i opozitës Lulzim Basha, i ftuar në emisionin “Opinion” të gazetarit Blendi Fevziu, tha se Kryeministri Rama e dinte që para 6 muajsh që negociatat për integrimin në BE nuk do të hapeshin.
“Edi Rama e dinte që negociatat s’do të hapeshin që para se të vinte deputeti i CDU-së. Edhe Meta e dinte këtë, edhe ne gjithashtu. Para gjashtë muajsh, ministri Bushati ka takuar Krichbaum në Gjermani dhe i është thënë se çfarë problemesh ka Shqipëria. Po kështu, para 1 jave e gjysmë, Bushati është takuar me ministrin e Jashtëm gjerman dhe i është thënë e njëjta gjë. Kështu, Rama e dinte dhe Bushati nuk e ngriti si çështje hapjen e negociatave”, tha Basha.
Kreu i opozitës shtoi gjithashtu se pengesë nuk është vetëm vettingu, por edhe shumë probleme të tjera reale si droga, krimi dhe korrupsioni.
“Ka pasur probleme me ligjet që duhet të buronin nga Kushtetuta e rënë dakord me konsensus unanim”,- ka thënë ai.
Basha theksoi edhe një herë rekomandimet e kancelares Angela Merkel. Sipas tij, përveç pesë kushteve duhet të bëhet progres edhe në luftën kundër krimit, korrupsionit dhe zgjedhje të ndershme.
Duke u përgjigjur akuzave të qeverisë, Basha theksoi se është pro hapjes së negociatave për anëtarësimin në BE.
“Nëse do të ishte në dorën time, do të ishte firmosja për hapjen e negociatave.”, tha kreu i PD-së.
Por, ai shtoi se hapja e negociatave nuk është në dorën e tij, por në dorën e vendeve të anëtarëve të BE-së.
Ndër të tjera, Lulzim Basha bëri edhe një propozim për Edi Ramën, “të bëjnë debat të përmuajshëm në television. “Unë jam gati, ai nuk do”, tha Basha.
Sipas tij, kjo do ishte shumë e vlefshme për demokracinë.
