Bernard Berisha tashmë do të nisë aventurën e re te Terek Grozni. Mesfushori kosovar mbetet brenda kampionatit rus por këtë herë në skuadër do të gjejë edhe dy shqiptarë të tjerë, sulmuesi dhe mesfushorin e kuqezinjëve, Bekim Balaj dhe Odisë Roshi.
Në një prononcim për “Super Sport” Berisha theksoi që ky është fillimi i një rruge përmes së cilës do të shkojë shumë larg.
“Mund të them se jam shumë i kënaqur me kontratën që kam nënshkruar, por ky është vetëm fillimi, një motiv për t’u përmirësuar edhe më shumë. Po më shpërblehet puna dhe sakrifica që kam bërë për disa vite. Të them të drejtën, nuk e konsideroj kontratën më të rëndësishme të karrierës sime. Mendoj se ky është vetëm fillimi dhe në të ardhmen do të jem pjesë e një skuadre më të madhe. Por për ta arritur këtë objektiv, më duhet të punoj akoma më shumë”, u shpreh 25-vjeçari për “SuperSport”.
Balaj dhe Roshi
“Balaj dhe Roshi janë miqtë e mi, dhe besoj se me ta do ta kem shumë më të lehtë përshtatjen. Unë kisha shumë oferta të tjera, por dëshiroja të isha në një ekip me ta. Mendoj se kam bërë zgjedhjen e duhur”, nënvizoi lojtari nga Peja.
Kosova
“Kosova nuk është më e izoluar si më parë, dhe për këtë ndihem mjaft i lumtur. Jemi munduar të paraqitemi sa më mirë, por të mos harrojmë se jemi në një grup shumë të fortë. Besoj se në 2017-n do të vijë fitorja e parë e Kosovës në këto eliminatore”, përfundoi Bernard Berisha.
Discussion about this post