Kreu i Partisë Demokratike, Sali Berisha, ka theksuar se zgjedhjet e Edi Ramës janë shpallur si një “farsë elektorale” nga tre rezoluta ndërkombëtare, të firmosura nga 193 parti politike nga e gjithë bota.
Duke iu përgjigjur komenteve të qytetarëve, Berisha theksoi se këto rezoluta kanë tronditur themelet e asaj që ai e cilësoi si “narkokraci dhe diktaturë” të Ramës.
Berisha shtoi se PD do të bëjë çdo përpjekje për të mbrojtur votën dhe për të siguruar një numërim të drejtë dhe transparent të çdo vote të qytetarëve. Ai u shpreh i vendosur për të firmosur më 11 maj një fitore të opozitës, duke garantuar qytetarët se nuk do të lejojnë asnjë abuzim gjatë procesit zgjedhor.
Pjesë nga fjala e kreut të PD Sali Berisha:
Sigurisht që ne, do bëjmë të gjitha përpjekjet për mbrojtjen e votës. Por, i dashur Leart shkojmë në këto zgjedhje pasi tre rezoluta ndërkombëtare, të firmosura së bashku nga 193 parti politike të planetit kanë damkosur zgjedhjet e Edi Ramës si një farsë elektorale.
Pra, kanë dridhur themelet e narkokracisë dhe diktaturës së tij.
Ne, garantojmë shqiptarët që bëjmë çdo përpjekje për të numëruar çdo votë të tyre dhe për të firmosur më 11 maj fitoren e opozitës.
