Dita e gjashtë janarit, e cila simbolizon ditën e shenjtë të “Ujit të Bekuar” çdo vit përcillet si një festë e madhe që festohet nga të gjithë besimtarët ortodoksë. Kjo ditë mbledh qindra besimtarë të krishterë që kanë përjetuar çastet emocionuese të hedhjes së kryqit në ujë.
Kështu, 6 janari për besimtarët ortodoksë nis që në orët e para të mëngjesit me rite fetare të zhvilluara pranë katedraleve ose kishave të qyteteve në vend.
Në simbolikë të kësaj dite, qytetarët mbushin shishe në shatërvanin ku hidhet kryqi dhe më pas me këtë ujë spërkatin shtëpitë e tyre në shenjë mbarësie.
Festimeve të kësaj dite si çdo vit iu bashkuan edhe besimtarët ortodoksë të Fierit, të cilët u mblodhën sot në Kishën e Shën Gjergjit. Gjithçka nisi me meshën në kishë dhe më pas me një varg të gjatë besimtarësh që iu drejtuan shatërvanit në sheshin “Europa” ku bëhet çdo vit hedhja e kryqit në ujë.
Pavarësisht temperaturave të ulëta, disa të rinj u hodhën për ta kapur kryqin dhe ishte sërish 13-vjeçari Athanas Davidhi që për të tretin vit radhazi e kapi atë. (XH.A/SHUPLAKA)
