Blushi: Kush beson se bota po bëhet më e barabartë se ka Apple, duhet mos harrojë se ka edhe Aleppo

Deputeti i LIBRA-s, Ben Blushi ka shprehur keqardhjen për vdekjen e shumë fëmijëve në Aleppo të Sirisë.

Me anë të një postimi në Facebook, Blushi nuk kursen as kritikat për Fuqitë e Mëdha, të cilat nuk kanë ndërmarrë asnjë veprim për atë çfarë po ndodh me popullsinë civile në Aleppo.

Postimi i plotë i Ben Blushit:

“Më shumë se 30 mijë njerëz presin të dalin nga Aleppo, nje qytet sirian që prej gati katër vitesh ka përjetuar dhunën dhe masakrat më te egra në këtë shekull. Dikur Aleppo ishte qyteti i tretë më i madh i Perandorisë Otomane pas Kostandinopojës dhe Kairos, ndërsa dhjete vite më parë kishte mbi 2 milion banorë.

Sot është një qytet fantazëm edhe për shkak të mosmarrveshjeve të Fuqive të Mëdha dhe sidomos për shkak të interesave të Fuqive Rajonale që duan të bëhen të Mëdha. Fatkeqësi që shumë fëmijë të Aleppos nuk do bëhen dot kurrë të mëdhenj. Kush beson se bota po bëhet më e barabartë se ka Apple, duhet mos harrojë se ka edhe Aleppo!”

Më herët reagoi edhe ministri i jashtëm Ditmir Bushati, i cili shprehej se “Rënia e Halepit dhe shpopullimi gjakësor i orkestruar nga regjimi i Bashar El Asad, janë një njollë më shumë në ndërgjegjen e rrënuar ndërkombëtare“. (A.R/SHUPLAKA)