Kryetari i Kuvendit të Shqipërisë dhe njëherazi bashkëkreu i aleancës në pushtet, Ilir Meta, ka shprehur mendimin se opozita duhet t’i japë fund bojkotit dhe të kthehet në Kuvend javën e ardhshme.
I ftuar në “Zonë e lirë”, ai ka theksuar se PD mund të kthehet ndërkohë që vazhdon protestën, e cila është sipas tij një e drejtë e tyre. Ai u shpreh se “opozita jashtë parlamentit është pa sens, pasi ky është një parlament legjitim”.
“Rruga më e mirë është vazhdimi i axhendës së parlametntit dhe të vendosjes së një dialogu që adreson disa nga shqetësimet kryesore të opozitës, të cilat krijojnë një klimë sa më garantuese për zgjedhjet e 18 qershorit që të gjithë të jenë të qetë. Pse të mos kemi dy procese, edhe parlamenti të vijojë punën normalisht, por edhe protesta le të vijojë.”, është shprehur Meta.
Sa për qeverinë teknike, ai deklaroi se çështja e besimit nuk zgjidhet me ultimatume: “Qeveria teknike? Opozita të vijë në parlament, të vijojë axhenda e parlamentit dhe njëkohësisht të vijojë dialog me OSBE/ODIHR-in për të zgjidhur disa çështje që janë të mundshme për t’u zgjidhur për zgjedhjet e 18 qershorit. Për mua është e papranueshme rruga e ultimatumit. Të bëjmë gjithçka për të mos sakrifikuar zgjedhjet e 18 qershorit pasi janë shumë të rëndësishme.” (XH.A/SHUPLAKA)
