Pas diskutimeve në disa prej Komisioneve Parlamentare, Buxheti i vitit 2018 do të hidhet sot për votim në Kuvend, votim me shumicë të thjeshtë.
Projekligji është pika 9 e rendit të ditës. PD dhe LSI e kanë deklaruar tashmë votën e tyre “Kundër” ndaj këtij projektiligji.
‘’Unë nëse mund t’i vë një emër këtij buxheti është “Buxheti i oligarkëve”. Ky buxhet rrit taksat për të gjithë bizneset e vogla, rrit taksat për qytetarët, vendos rritjen e akcizës, por nga ana tjetër ofron lehtësira fiskale vetëm për një grusht njerëzish, të cilët do t’i vendosi kryeministri se kush janë’’’’, është shprehur deputetja e PD-së, Jorida Tabaku.
‘’ Buxheti 2018 rrit taksat për 99 për qind të shqiptarëve që janë të varfër dhe të klasës së mesme dhe ul taksat për 1 përqind të oligarkëve që janë klientë të qeverisë. Buxheti nuk parashikon rritje pagash dhe pensionesh, ndërkohë që tatimi për të ardhurat e qytetarëve janë rritur mbi dyfish, sikurse është rritur me mbi 50 për qind tatimi mbi vitimin për bizneset në katër vitet e fundit”, është shprehur më tej kryetarja e LSI-së, Monika Kryemadhi.
Nga ana tjetër për socialistët ky vit që vjen do të sjellë edhe një rritje ekonomike të qëndrueshme.
‘’Synojmë një rritje ekonomike mbi 4 për qind. Kemi një deficit buxhetor që është sa gjysma e rritjes ekonomike, pra 2 për qind dhe kjo tregon përgjegjshmëri maksimale”, është shprehur deputetja e PS-së Gjylameti.
Të tjera projektligje në rendin e ditës janë kryesisht me karakter ekonomik, si për tatimet dhe tarifat doganore.
(E.K/Faxweb)
