Hakan Calhanoglu vuri në dukje që Interi e “ka analizuar dhe studiuar” Manchester City para ndeshjes së tyre finale në Ligën e Kampionëve dhe ai beson që skuadra e tij “do t’i tregojë atyre fuqinë dhe kualitetin që ka”.
Zikaltërit, edhe pse kishin një sezon të luhatshëm në Serie A, kanë lënë përshtypje të mirë në Ligën e Kampionëve ku kanë mundur Porton, Benfican dhe Milanin për të arritur në finale të Stambollit. Hera e fundit që Interi ishte në finale të Ligës së Kampionëve ishte viti 2010, ku ata mposhtën Bayen Munchen dhe fituan tripletën.
Manchester City tashmë i ka fituar dy tituj dhe e dëshiron tripletën e tyre, pasi që më parë ka fituar Premier Ligën dhe FA Cup dhe janë në kërkim për ta bërë një përmbyllje historike të sezonit të tyre në stadiumin “Ataturk” në Stamboll.
Duke folur në konferencën për media, Calhanoglu fillimisht ka folur për shanset e tij se a do të shënojë në finale të Ligës së Kampionëve.
“Pse jo? Ne do të përpiqemi, por edhe ata do të jenë të gatshëm ta bëjnë këtë. E dini më mirë së Pep analizon shumë mirë skuadrat kundëshrtare, shpresoj që të shënoj, por më e rëndësishme është të fitojmë”.
Pastaj ai ka folur për përgatitjet e Interit për finalen e Ligës së Kampionëve.
“Ne kemi analizuar, studiuar rivalët tonë, është e rëndësishme që ta kuptojmë se si luajnë ata. Ne do t’ju tregojmë atyre fuqinë tonë, kualitetin tonë”.
“Ne nuk do të frikësohemi, ata janë shumë të mirë në të dy fazat e lojës por ne do t’i tregojmë atyre çfarë jemi në gjendje të bëjmë. Ne gjithmonë luajmë mirë në Ligën e Kampionëve”, tha ndër të tjera Calhanoglu.
