Zv/ndihmës Sekretari amerikan i Shtetit, Hoyt Brian Yee, vijon vizitën e tij zyrtare në Tiranë, pas mbërritjes një ditë më parë në Shqipëri në kuadër të negociatave për zgjidhjen e krizës politike.
Ai është në pritje të një përgjigje nga kryetari i Partisë Demokratike, Lulzim Basha, pasi i ofroi ditën e djeshme paketën e McAllister si zgjidhje mes palëve politike.
Konkretisht, zyrtari i lartë amerikan i ka lënë 24 orë kohë Bashës për të pranuar paketën e sugjeruar, ku ofrohet posti i zëvendëskryeministrit dhe katër ministrave.
Përpara takimit me kryetarin e PD-së, ai takoi kryeministrin Edi Rama dhe kryetarin e Kuvendit të Shqipërisë, Ilir Meta.
“ Ne mbështesim platformën e McAlliste, ka një ofertë nga ai, shpresoj që partitë ta pranojnë. Duhet dialog mes palëve, koha po skadon. Nëse disa parti përjashtojnë veten, dëmtojnë veten. Bojkoti dëmton imazhin e vendit dhe investimet. Asnjë parti që ka bojkotuar, s’ka përfituar.
Është e drejta e partive për të mos marrë pjesë në zgjedhje. Është shumë e rëndësishme që zgjedhjet të bëhen. Ato janë më të mira kur ka përfaqësim të gjerë. Certifikimi i zgjedhjeve nga BE, OSBE dhe SHBA. Nëse zgjedhjet certifikohen të rregullta, do t’i njohim.”, u shpreh ndër të tjera Yee në takimin e tij me gazetarët.
(XH.A/SHUPLAKA)
