Çollaku: Dënimi i Ratko Mlladiç, një akt humanizmi dhe lehtësim për shqiptarët

Kreshnik Çollaku e konsideroi një akt humanizmi në nderim të mijëra viktimave dënimin e Ratko Mlladiç, nga Gjykata Ndërkombëtare e Hagës.

“Dënimi është një akt historik që sanksionon përfundimin me triumf të së drejtës të një ndër proceseve më të dhimbshme në historinë e Ballkanit. “- shprehet Çollaku në një status në Facebook.

Kreu i Departamentit për Politikën e Jashtme në PD thotë se “Dënimi përcjell vlerën e botës së qytetëruar e demokratike se ajo nuk toleron individe dhe vullnete politike që shohin dhunën dhe shtypjen e të drejtave njerezore si mjet për realizmin e qëllimeve politike e nacionaliste. “

“Dënimi i një krimineli të nivelit të Ratko Mlladic, bashkëpunëtorit të afërt të kasapit të Ballkanit Sllobodan Millosheviç, veçanërisht është një lehtësim për kombin shqiptar, një lehtësim për viktimat shqiptare, për genocidin në trojet shqiptare, një shpërblim  për besimin e palekundur të shqiptarëve  tek e drejta, paqja dhe te vlerat demokratike.”- tha kreu i Departamentit për Politikën e Jashtme në PD.​ (B.H/Faxweb)