Dashamir Tahiri është një prej tre emrave që Prokuroria lakoi sot lidhur me çështjen e dekriminalizimit dhe një prej dy deputetëve për të cilët kërkohet të lënë detyrën.
Më parë anëtar i Partisë për Drejtësi, Integrim dhe Unitet (PDIU), prej 13 tetorit të vitit 2016, ai është anëtar i grupit parlamentar të Partisë Demokratike.
Formulari i vetëdeklarimit në kuadër të ligjit të dekriminalizimit është marrë në shqyrtim nga Komisioni Qendror i Zgjedhjeve dhe së fundmi Prokuroria deklaroi se ai është një ndër emrat që preken nga dekriminalizimi.
Deputeti Dashamir Tahiri akuzohet se nuk ka deklaruar në formularin e “Dekriminalizimit” dy dënime, përkatësisht një e vitit 1995, për të cilën është raportuar nga Policia në Foggia për “krime lidhur me falsifikimin e parave” dhe në vitin 2009 dënuar me 9 muaj burgim për përdorim “leje drejtimi shqiptare të falsifikuar”.
Në shpjegimet e tij për sektorin e “Dekriminalizimit”, deputeti demokrat është shprehur se nuk ka qenë në dijeni të masës së dënimit “burgim” në Ravena. Lidhur me rastin e parë, atë të “falsifikimit të parave”, Tahiri ka deklaruar se ka rënë pre e mashtrimit.
Sipas deputetit, bëhet fjalë për një episod të shënuar në autostradë ku ai është mashtruar nga një kamerier që i ka dhënë para false, çka më pas është ndjekur nga akuza e “falsifikimit të parave”. (XH.A/SHUPLAKA)
Discussion about this post