Përpjekja e Koresë së Veriut për të vendosur satelitin e parë spiun të vendit në hapësirë, dështoi të mërkurën. Ky dështim shihet si një pengesë ndaj ambicieve të liderit Kim Jong Un për të rritur aftësitë e tij ushtarake në kohën kur tensionet me Shtetet e Bashkuara të Amerikës dhe Korenë e Jugut po rriten.
Pas pranimit jashtëzakonisht të shpejtë të dështimit të tyre, Koreja e Veriut shprehu synimin e saj për të vazhduar me një lëshim të dytë, duke synuar të korrigjojë problemet e hasura gjatë ngritjes fillestare të raketës.
Kjo deklaratë nënkupton se Kim Jong Un mbetet i vendosur në përpjekjet e tij për të zgjeruar armatimin e vendit dhe për të ushtruar presion shtesë si ndaj Uashingtonit ashtu edhe ndaj Seulit, veçanërisht në një periudhë ku negociatat diplomatike kanë ngecur.
Koreja e Jugut dhe Japonia u kërkuan shkurtimisht banorëve të strehohen gjatë nisjes së satelitit.
Sipas ushtrisë së Koresë së Jugut, aktualisht po bëhen përpjekje për të rikuperuar një objekt që besohet të jetë një fragment i raketës së rrëzuar koreano-veriore. Ministria e Mbrojtjes shpërndau fotografi të një cilindri të bardhë, metalik, duke e identifikuar atë si një përbërës të dyshuar të raketës.
Sipas vëzhguesve, një lëshim satelitor nga Koreja e Veriut shkel rezolutat e Këshillit të Sigurimit të Kombeve të Bashkuara, të cilat e ndalojnë vendin të angazhohet në çdo lëshim duke përdorur teknologji balistike.
Pavarësisht dështimit të lëshimit, megjithatë, përpjekja “flet për përmirësimin e vazhdueshëm të aftësive të Koresë së Veriut, duke mprehur programin e saj të raketave dhe armëve bërthamore”, tha Eleanor Shiori Hughes, një anëtare jorezidente në institutin e mendimit Econvue me bazë në Çikago.
Megjithëse Shtetet e Bashkuara, Koreja e Jugut dhe Perëndimi kanë dënuar lëshimet e automjeteve hapësinore të Veriut për përdorimin e teknologjisë së raketave balistike, Këshilli i Sigurimit i Kombeve të Bashkuara do të luftojë për ta trajtuar çështjen nën një front të bashkuar mes ndarjeve për luftën e vazhdueshme në Ukrainë, tha Hughes.
Hughes tha gjithashtu se ishte e rëndësishme që Japonia të përmirësonte sistemin e saj të emergjencës “J-Alert” pas paralajmërimeve të gabuara pas lëshimeve të fundit të raketave të Koresë së Veriut, duke shtuar se sistemi mund të jetë i nevojshëm një ditë për zhvillime të mundshme që lidhen me Kinën.
Pheniani tha se do të hetojë shkakun e dështimit dhe do të synojë për një lëshim të dytë sa më shpejt të jetë e mundur, pa specifikuar një datë. REL
