Një ngjarje e rëndë ka ndodhur paraditen e sotme në Bulqizë, ku si pasojë e rrjedhjes së një bombole gazi, 3 persona kanë vdekur, dhe një tjetër është plagosur, anëtarë të së njëjtës familje.
Në një lidhje telefonike për Fax News, kryebashkiaku i Bulqizës Lefter Alla tha se kanë humbur jetën nëna me dy fëmijët e saj, mosha e të cilëve ende nuk dihet, ndërkohë që është në gjendje të rëndë vajza tjetër e familjes Tola.
Rrjedhja e bombulës së gazit ka ndodhur në fshatin Ostren, ndërkohë që dhe gjendja e të plagosurës paraqitet e rëndë.
Mjekët e Bulqizës po kërkojnë ndihmën nga ajri, për ti dhënë ndihmën mjekësore të specializuar në Tiranë vajzës që ka mbetur e plagosur. Fshati ndodhet rreth një orë larg nga Bulqiza, dhe kjo ka bërë që ndërhyrja të vonojë.
Burime bëjnë me dije se rrjedhja e bombulës së gazit ka ndodhur në banesën e Ylber Tolës, ndërsa nuk dihet ende identitetet e plota të personave që kanë mbetur viktimë nga kjo ngjarje me përmasa të rënda.
Njoftimi paraprak i policisë për ngjarjen:
Në Ostren, Bulqizë, është marrë informacion se në banesë janë gjetur pa shenja jete shtetasja R.T, rreth 40 vjeçe, dhe dy fëmijët e saj (vajza dhe djali), që dyshohet se janë helmuar nga bombola gazit.
Në gjendje të rëndë shëndetësore është dhe një pjestar tjetër i familjes ku po transportohet për në spital.
Grupi hetimor ka shkuar në vendngjarje dhe vijon hetimet për zbardhjen e ngjarjes.
(E.K/Faxweb.al)
Discussion about this post