Policia e Vlorës ka filluar procedimin penal ndaj firmës së ndërtimit, që është marrë me projektin e Lungomares. Kjo pasi projekti është devijuar duke rënë ndesh me kriteret e përcaktuara në kodin rrugor.
“Specialistët e Hetimit të Krimit Kundër Korrupsionit në Drejtorinë Vendore të Policisë Vlorë kanë nisur procedim penal ndaj kompanisë/firmës së ndërtimit e cila ka realizuar projektin e ndërtimit të shëtitores të vijës bregdetare Lungomare Vlorë, pasi prej kësaj firme janë krijuar disa degëzimeve dhe hyrje-dalje në disa objekte, duke devijuar projektin, që bie ndesh me kriteret e përcaktuara në Kodin Rrugorë të Republikës së Shqipërisë.”, njofton policia.
Kujtojmë se projekti i Lungomares, është ndër më të komentuarit sidomos për shkak të aksidenteve që kanë ndodhur në rrugën ku po kryhen punimet.
Gjithashtu një tjetër rast është konstatuar në fshatin Hoshtimë-Treblovë,Vlorë për “Shpërdorim detyre, ndërtim i paligjshëm dhe shkatërim prone” prej katër shtetasve të tjerë, konkretisht:
-P.Sh., 49 vjeç dhe Z.SH., 46 vjeç, banues në Sevaster, Vlorë, (vëllezër).
-V.B., 45 vjeç, banues në Peshkëpi, Vlorë,
-F.B., 35 vjeç, banues në Llakatund, Vlorë.
Policia njofton se ndaj personave të mësipërm ka filluar procedimi penal pasi nga të dhënat e marra dhe nga hetimet e kryera rezulton se shtetasit e lartëpërmendur në bashkëpunim me njëri-tjetrin, në fshatin Hoshtimë/Treblovë, kanë hapur një karrierë që shfrytëzohet për nxjerrje të rërës bituminoze, për të cilën nuk kanë leje shfrytëzimi, duke nxjerrë sasira të konsiderueshme të kësaj lënde minerale, që sipas legjislacionit mund të shfrytëzohet vetëm pasi të jenë pajisur me leje përkatëse.
Materialet iu kaluan Prokurorisë se Rrethit Gjyqësore Vlorë për të dyja rastet e mësipërme për veprën penale ”Shpërdorimit të detyrës”, ”Ndërtim i paligjshëm” dhe ”Shkatërrim prone”, parashikuar nga nenet 248, 199/a dhe 150 të Kodit Penal. (D.D/Shuplaka)
Discussion about this post