Në Policinë e Shtetit, po punohet për ngritjen e një strukture të posaçme, e cila do të jetë e specializuar vetëm për dhunën në familje. Bëhet fjalë për një organ të ri që do të ngrihet nga e para për të menaxhuar më në detaje rastet e raportuara të dhunës, ndjekjen e tyre në mënyrë të vazhdueshme dhe mbi të gjitha funksionimin e urdhrave të mbrojtjes me vendim gjykate, të cilat në jo pak raste kanë treguar se nuk e kanë ndaluar dhunën, përkundrazi shërbyen për ta përkeqësuar. Deri tani rastet e dhunës janë trajtuar në nivel komisariati.
Në vijim, me vendim të Këshillit të Ministrave pritet të ketë rritje të organikës së Policisë së Shtetit me të paktën 500 punonjës më tepër dhe një pjesë e tyre do të jenë pjesë e kësaj strukture kundër dhunës në përgjithësi, dhe ndaj grave në veçanti. Pjesë e nismës për të ndryshuar një realitet që sa vjen e rrit shifrat e dhunës është edhe kthimi i pronave të sekuestruara në qendra për trajtimin e viktimave të dhunës, të cilat synojnë rikthimin e tyre në jetën aktive në shoqëri, pas traumave të së kaluarës.
Vetëm në 3 muajt e parë të vitit 2024 numri i rasteve të dhunës në familje është shtuar me 11%, përkatësisht 465 raste në janar-mars 2024 dhe 414 në janar-mars 2023, ndërsa në më shumë 75% të tyre bëhet fjalë për gra dhe vajza të dhunuara.