Një ngjarje e rëndë ka ndodhur sot në qytetin verior të Shkodrës, ku një banesë është përfshirë nga flakët.
Të ndihmuar nga era, flakët e zjarrit rrezikojnë edhe dy banesa të tjera aty pranë. Mësohet se ndërsa zjarrfikësit kanë mbërritur për të shuar zjarrin, dyshohet se në një nga banesat e përfshira nga flakët ka mbetur brenda një i moshuar. Ai quhet Haki Hoxha dhe është 74 vjeç.
Ngjarja ka ndodhur në lagjen “Vojo Kushi” të qytetit të Shkodrës. Ende nuk dihet shkaku i nisjes së zjarrit megjithatë dyshohet se bëhet fjalë për një bombol gazi.
NJOFTIMI I POLICISË
Me datë 10.03.2017, në orën 16.12 njoftohemi se në lagjen “Vojo Kushi”, Shkodër, në vendin e quajtur rruga e Vajgurit, në një banesë dy katëshe ku jetojnë dy familje, ka rënë zjarr.
Menjëherë në vendngjarje kanë shkuar shërbimet e policisë dhe zjarrfikësit.
Punonjësit e policisë kanë evakuuar shtetasin R. H së bashku me familjen.
Ndërsa në banesën e shtetasit H.H., 74 vjeç, punonjësit e policisë dhe zjarrfikësit nuk u futen dot për shkak të përmasave të mëdha të flakëve e që kishin përfshirë këtë banesë.
Shtetasi H.H. sipas deklarimeve të bashkëshortes dyshohet se ka ngelur brenda në banesë, ndërsa bashkëshortja ka dalë pa pësuar lëndime.
Në vendngjarje ndodhen shërbimet e Policisë, zjarrfikëset dhe autoambulanca.
Punohet për fikjen e zjarrit. Veprimet po kryhen me grup hetimor, në përfundim do të jepet dhe informacion i plotë.
