Saimir Tahiri nuk është më as deputet.
Në një konferencë për mediat nga kryesia e Kuvendit, Tahiri dha lajmin se dorëzon mandatin, për t’i hapur rrugë drejtësisë dhe përballjes me të vërtetën.
Ish-ministri i Brendshëm, që drejtoi përreth 4 vite Policinë e Shtetit, rendin dhe sigurinë publike, sot është nën hetim për trafik ndërkombëtar droge.
Tahiri tha se vendimi i tij vjen pas 6 muajve heshtje, për t’u gjykuar si qytetar i lirë.
Nuk dihet cili do jetë fati i ish-ministrit, por nga sot karriera e tij politike është ndërprerë.
Por kush është Saimir Tahiri? Si u katapultua në Partinë Socialiste për t’u bërë një nga njerëzit më të besuar të Kryeministrit Rama?
Kryeministri Edi Rama ka thënë se është njohur me Tahirin në fushatën e 2003, si pjesë e të rinjve të FRESSH.
Më pas kur Rama u zgjodh kryetar partie, Tahiri i ka dërguar një email, me disa ide për ringritjen e PS.
Saimir Tahiri, sot 39 vjeç, i diplomuar si jurist, ka spikatur në Partinë Socialiste si zëdhënës në vitin 2007, ku me një dërrasë të zezë dhe shkumës në dorë rreshtonte në tabelë gabimet e qeverisë Berisha.
Rama u pa se e pëlqeu direkt Tahirin, aq sa në vitin 2008 vetë Rama e kurorëzoi në Bashkinë e Tiranës me Fatlinda Berishën.
Tahiri vazhdoi rrugëtimin e tij në opozitë duke forcuar pozitat e tij përkrah Ramës.
Miqtë e tij të ngushtë thanë se ishte Gramoz Ruçi që për shkak të lidhjeve krahinore e mbështeti Tahirin në PS.
Në protestën e 21 Janarit ku humbën jetën 4 protestues, Tahiri ishte prijësi dhe zëvendësuesi i Ramës.
Ndryshe nga Veliaj, Tahiri ishte një nga drejtuesit e protestës që u përplas me policinë.
Dy vite më vonë në fushatën e vitit 2013, Tahiri u kandidua si deputet për listën e Tiranës.
Me sloganin “Rilindje” dhe me një mbështetje të fortë në bazën e socialistëve ku spikat zona e Kombinatit, Tahiri dha rezultate befasuese për socialistët.
Dega e Tiranës e drejtuar prej Tahirit fitoi bindshëm përballë demokratëve.
“Policia që duam”
Slogani “Policiaqëduam” ishte gjetja e Tahirit. Para se ekipi i PR-it në PS ta vendoste si slogan kryesor të fushatës 2017 me “Shqipëria që duam”, ishte Tahiri që e kishte ‘testuar’ për më shumë se dy vite.
Tahiri ministër i Brendshëm ishte padyshim një ‘mjeshtër’ i show-t.
Policia e Saimir Tahirit
Ndryshime në uniforma, makina dhe rroga, janë disa nga kontributet e ish-ministrit në krye të Policisë së Shtetit.
Përplasjet e herëpashershme me opozitën detyruan të besuarin e Ramës dhe Tahirit, Haki Çakon të jepte dorëheqjen e më pas ta anulonte, kur në skenë doli skandali i përgjimeve me pajisjen IMSI Catcher.
Në të njëjtën kohë që Tahiri drejtonte policinë, opozita denonconte parcelat me drogë që po mbilleshin në Shqipëri.
Të dy njëzëri, Rama dhe Tahiri nga foltorja e Kuvendit me zërin në kupën e qiellit, përbetoheshin se kanabisi aty kishte qenë gjithmonë por se socialistët e gjetën dhe e kapën…
Mallkimi i Audit AA003 GB
Historia mori ‘tatëpjetën’, kur qytetari dixhital i Berishës denoncoi lidhjet e Tahirit me kushërinjtë e tij në Vlorë, grupin tashmë të njohur si “Habilajt”.
Përplasja me ish-shefin e Antidrogës, Dritan Zagani, bëri që Tahiri dhe Rama ta quanin këtë të fundit ‘spiun’, të dënuar për dekonsipirim operacionesh, dhe të lidhur me italianët.
Zagani thoshte se Tahiri drekonte me Habilajt në Vlorë dhe se makina përdorej prej tyre. Të njëjtit fakt i mëshonte edhe më shumë Partia Demokratike në vitin 2014.
Tahiri nuk i ka pranuar kurrë akuzat e PD-së për lidhje të tij me Habilajt. Sipas Tahirit, i vetmi gabim i tij ka qenë shitja e makinës tek njerëzit e gabuar.
Krisja me Ramën
Në mars të vitit të shkuar, Tahiri u shkarkua. Mediat e majta raportonin se ish-ministri nuk kishte pranuar të jepte dorëheqjen.
Për të “mbuluar” krisjen para elektoratit, Rama sakrifikoi dhe disa ministra të tjerë si Beqaj, Çuçi, e Klosi.
Rama tha se lirimi nga detyra po bëhej për një angazhim më të mirë në zgjedhjet që po afronin.
Nuk harroi spektaklin as në largimin nga detyra kur qindra policë i dhanë “Lamtumirën” duke e falenderuar në këtë mënyrë.
Policia pas largimit të Tahirit
Tahiri drejtoi fushatën për Tiranën duke i dhënë Partisë Socialiste 18 mandate “të arta”. Natën e numërimit të votave Tahiri bashkë me Veliajn shkuan në zyrën e Ramës.
Rezultati nuk mjaftoi që Tahiri të ringjitej në kabinet.
Në shtator, kur nisi punimet parlamenti i ri, ish-ministri u fotografua i vetëm në fund të sallës.
Skandali me Habilajt dhe nofka “Saje Qorri”
Disa javë pas betimit të qeverisë së re, nga Italia vjen lajmi se u arrestua grupi i Habilajve. Kaq mjaftoi që mbi Tahirin të mos kishte më ‘diell’ por vetëm shi dhe rrufe akuzash.
Prokuroria nisi hetimet për trafik ndërkombëtar droge, ndërkohë që PS dhe Rama u distancuan brenda 24 orësh.
Kryeministri e quajti njeriun më të afërt prej vitesh, por s’harroi të sqaronte se nuk është faji i tij apo i socialistëve nëse mes “stivës së rregullt qëllon edhe ndonjë dru i shtrembër”.
Tahiri ishte pagëzuar nga Berisha me nofkën “Saje Qorri”, por që prej tetorit, ky ‘nickname’ bëri xhiron e rrjetit.
3 Maj 2018 – Tahiri dorëzon mandatin
I përlotur, i irrituar dhe me disa luhatje të forta në fjalimin e tij, Tahiri dorëzoi mandatin.
Ish-ministri nuk harroi të përmendte “kusuret” e paraardhësve në qeveri, pasardhësve në detyrë e atyre që kanë qeverisur këtë vend. Me argumentin se do të hetohet si çdo qytetar i thjeshtë, Tahiri u largua nga Kryesia e Kuvendit ditën e sotme, për t’u rikthyer kushedi se kur.
Nuk dihet si do vijojë çështja Tahiri.
Disa thonë se ish-ministrin e pret burgu, të tjerë vënë dorën në zjarr se Rama e ka “shpëtuar”, por një gjë dihet me siguri, Tahiri është një nga ato raste që tregon se si një “Yll” në ngjitje kthehet sa hap e mbyll sytë në një “dru të shtrembër”.
(F.G/Faxweb.al)
Discussion about this post