Jola Hysaj, Sekretarja për Marrëdhëniet me Publikun në Partinë Demokratike, ka shprehur urimet e saj për nxënësit dhe mësuesit në fillim të vitit të ri shkollor, por njëkohësisht ka ngritur shqetësime të mëdha lidhur me rënien e numrit të nxënësve në arsimin parauniversitar.
“Suksese të gjithë nxënësve në nisjen e vitit të ri shkollor, në veçanti të gjithë fëmijët që përjetojnë për herë të parë këtë ditë të rëndësishme,” ka shkruar Hysaj në Facebook.
Megjithatë, postimi i Hysajt është shoqëruar me një shqetësim të madh në lidhje me të dhënat e fundit për numrin e nxënësve. Ajo ka theksuar se ka një diferencë alarmante mes të dhënave të Cens 2023 dhe raportimeve të tjera. Sipas të dhënave të Cens 2023, numri i individëve mbi 6 vjeç që ndjekin arsimin parauniversitar ishte 317,213 nxënës, ndërsa INSTAT raportoi se ky numër ishte 349,827 nxënës për vitin shkollor 2023-2024. Kjo tregon një rënie prej rreth 27 mijë nxënësish ose 9.3% më të ulët në krahasim me shifrat zyrtare të raportuara në fillim të vitit akademik.
Hysaj ka shprehur keqardhje për këtë rënie drastike të numrit të nxënësve, duke përmendur se të dhënat e Cens 2023 tregojnë një ulje të dukshme të nxënësve në arsimin 9-vjeçar, ku INSTAT kishte raportuar mbi 258 mijë nxënës, ndërsa Cens 2023 tregoi rreth 231 mijë.
Në përfundim të postimit, Hysaj ka bërë thirrje për ndryshime të menjëhershme në qeverisje, duke theksuar se kjo është “drama më e madhe që po i ndodh arsimit dhe vendit tonë.”
Reagimi i plotë:
Suksese të gjithë nxënësve në nisjen e vitit të ri shkollor, Në vecanti të gjithë fëmijët që ulen për herë të parë në bankat e shkollës, sepse janë ata që e përjetojnë me më shumë emocione këtë ditë të rëndësishme në shkollimin e tyre.
Urimet për një vit të mbarë e të suksesshëm shkojnë dhe për të gjithë mësuesit dhe drejtorët e shkollave.
Me keqardhje duhet të pranojmë se të dhënat e Cens 2023 kanë zbuluar se numri individëve +6 vjeç që ndjekin arsimin parauniversitar ishte 317,213 nxënës, teksa në të njëjtin vit shkollor (2023-2024) INSTAT, referuar Ministrisë së Arsimit, raportoi se arsimin parauniversitar +6 vjeç e ndiqnin 349,827 nxënës.
Numri i nxënësve që ndjekin arsimin nga klasa e parë deri në përfundim të shkollës së mesme ishte rreth 27 mijë nxënës më pak ose 9.3% më i ulët se sa shifra zyrtare që është referuar në fillimin e vitit akademik.
Të dhënat e Cens 2023 kanë treguar rënie drastike të numrit të nxënësve në shkolla. P.sh., INSTAT referoi se në vitin akademik 2023-2024 e ndiqnin arsimin 9-vjeçar mbi 258 mijë nxënës, ndërsa sipas Cenc 2023 ky nivel arsimor ndiqej nga rreth 231 mijë nxënës.
Kjo është DRAMA më e madhe që po i ndodh arsimit dhe vendit tonë
Është koha të marrim frerët e fatit të vendit tonë në dorë, është koha të ndryshojmë këtë qeverisje më shpejt se kurrë më parë.
Discussion about this post