Prej disa ditësh policia rrugore e Tiranës po kryen kontrolle me dronin edukues, i cili sipas tyre ka si qëllim edukimin e drejtuesve të mjeteve, kryesisht në dhënien e përparësisë për këmbësorët, dhe shkeljet në ndryshimin e karrexhatave.
Gerhard Baka, specialist i trafikut urban, është shprehur për Fax News: Droni edukues ka funksione teknologjike të kohëve të fundit, i kryen veprimet sipas komandave tona, afron objektivin, evidenton shkeljet, ju sot asistuat në punën tonë të përditshme, që janë mosdhënia e përparësisë ndaj këmbësorëve. Janë 10 dronë në total, 7 prej tyre janë në punë.
Përveç tyre ne kemi edhe makinën inteligjente, që qarkullon në të gjitha akset, evidenton kryesisht shpejtëinë, përdorimin e celularit, rripin e sigurimit apo parakalimet e gabuara. Janë kategori të ndryshme shkeljes që evidentohen nga dronët, për moshdënie të përparësisë së këmbësorëve gjoba është 2 mijë lekë.
Mosdhënie e përparësisë në rreth nga 5-8 mijë lekë, dhe ulje e pikëve në patentë për rastet përsëritëse, si dhe mosrespektimi i lëvizjes në karrexhatë. Do ta jenë në fokusin tonë edhe mjetet me ndryshime në marmita që krijojë zhurmë.
Nuk ka asnjë lloj mënyre sesi drejtuesit e mjeteve ti shpëtojnë dronit, e kemi futur më së shumti për ndërgjegjësimin e drejtuesve të mjeteve. Shumë shpejt do të vijojmë dhe me edukimin e këmbësorëve, që të kalojnë vetëm në vendet e dedikuara për ta.
Sipas Bakës dronet janë lehtësisht të përdorshëm nga punonjësit e policisë, ndërkohë që bëri dhe një bilanc të gjobave, që janë vendosur deri tani pas përdorimit të këtyre paisjeve. Specialisti u shpreh se këto aksione të ndërmarra nga Rrugorja, kanë fokus kryesor edukimin e përdoruesve të rrugës, dhe jo ndëshkimin e tyre.
