E firmos Edi Rama, kush është drejtori i ri i Policisë së Shtetit

Është zgjedhur drejtori i ri i Policisë së Shtetit. Me propozim të ministrit të Brendshëm Fatmir Xhafaj dhe firmë të kryeministrit Rama, postin më të lartë të Policisë e ka marrë Ardi Veliu.

Deri më sot Ardi Veliu ka mbajtur postin e Drejtorit të Policisë së Tiranës, ndërsa më herët ai ka qenë pjesë e Policisë së Vlorës. 

Ky emërim vjen vetëm pak javë pas shkarkimit të Haki Çakos nga drejtimi i Policisë, teksa përkohësisht vendin e tij e ka zënë Rebani Jaupi. 

Pak ditë më parë Ardi Veliu mori edhe titullin ‘drejtor i parë’, një kusht i domosdoshëm ky për tu emëruar në postin e drejtorit të përgjithshëm. 

Në kriteret që duhet të përmbushen për të qenë Drejtor i Përgjithshëm në pikën b) të ligjit, thuhet që kandidati duhet “të ketë të paktën 15 vjet përvojë në polici, nga të cilat të paktën 10 vjet në pozita të larta drejtuese në strukturat e Policisë së Shtetit”.

Ardi Veliu nuk e plotësonte këtë kusht, ose më saktë pjesën e dytë të tij që thotë se kandidati duhet të ketë 10 vjet eksperiencë në pozita të larta drejtuese në Policinë e Shtetit. Po mesa duket kjo nuk është marrë parasysh nga ana e ministrit të Brendshëm.

Karriera profesionale:

Komandant i “Postës së Policisë”, Memaliaj, Tepelenë (1998-1999)
Shefi i Policisë së Rendit, Vlorë (1993-2002)
Shefi i sektorit të “Policisë me Uniformë”, Drejtoria e Policisë, Vlorë (2002-2004)
Shefi i sektorit të Rendit, Drejtoria e Policisë, Vlorë (2004-2006)
Shefi i komisariatit të Policisë, Durrës (2013-2014)
Zëvendësdrejtor për Sigurinë, Drejtoria e Policisë, Tiranë (2014-2015)
Drejtor i Kolegjit te Policise (Shkolla Bazë e Policisë) 2015 -2016
Drejtor i Policise Rrugore ne Drejtorine e Policise se Shtetit 29.07.2016 – 27.04.2017
Nga data 28.04.2017 Drejtor i Drejtorise Vendore te Policise

(E.K/FAXWEB)