Është shkarkuar nga detyra gjyqtari i Apelit të Shkodrës, Luan Dervishi, ky ka qenë vendimi i dhënë sot në Komisionin e Pavarur të Kualifikimit. Trupa gjykuese që mori këtë vendim ishin: Etleda Çiftja, Firdes Shuli dhe Pamela Qirko.
Gjyqtari Dervishi u bë pjesë e listës së dytë të kandidatëve për Këshillin e Lartë Gjyqësor, pas vakancës së shpallur për një pozicion nga Gjykatat e Apelit jashtë Tiranës.
Ai e ka mbaruar fakultetin e Drejtësisë në vitin 1985 dhe para se të emërohej gjyqtar në Gjykatën e Apelit të Shkodrës ka punuar si inspektor pranë Këshillit të Lartë të Drejtësisë.
Pët Dervishin si ILDKPI ashtu edhe institucioni për pastrimin e figurës, DSIK, e cilësuan si të papërshtatshëm.
ILDKPI tha se deklarimi i pasurisë nuk është i saktë, ndërsa DSIK tha se ka papërshtatshmëri për arsye se nga informacioni që dispononte për të rezulton i përfshirë në veprimtari korruptive duke e evidentuar se ekziston një kontakt i papërshtatshëm.
(E.K/FAXWEB.AL)
