Gjatë 24 orëve të fundit, reshjet kanë qenë të shtuara në të gjithë vendin, duke përfshirë shi dhe dëborë me intensitet të lartë. Sinoptikania Anira Gjoni bën të ditur se temperaturat pritet të ulen ndjeshëm gjatë gjithë javës, ndërsa e mërkura do të shënojë pikën më të ftohtë, me termometrin që do të zbresë deri në -10°C.
Sot reshjet e shiut do të ndalen në pjesën më të madhe të vendit, por temperaturat do të vazhdojnë të bien. Ndërkohë, në zonat juglindore reshjet e dëborës do të vazhdojnë, duke krijuar vështirësi në qarkullim.
Era do të jetë e fortë, kryesisht në veri të vendit, duke theksuar nevojën për kujdes nga banorët në zonat më të ekspozuara. Moti i acartë dhe temperaturat nën zero kërkojnë masa të veçanta për mbrojtjen e shëndetit dhe sigurinë në rrugë.
