Kryeministri Edi Rama mbrëmjen e djeshme u distancua nga Vangjush Dako, lidhur me dosjen 339, duke thënë se ai është një qytetar i lirë, dhe nëse ka kryer një vepër penale duhet të dalë përpara drejtësisë.
Në përpjekje për të shmangur vëmendjen nga përgjegjësia e tij, Dako duket se do të ketë fatin e Tahirit, që fillimisht deklarohej gjithandej si i pafajshëm nga Rama, dhe më pas lëshohej kur kuptohej se rreziku i afrohej karriges së kryeminsitrit.
Pikërisht këtë lehtësi të Ramës për të shitur bashkëpunëtorët e tij, e ka komentuar dhe ish-ministri Ylli Manjani, i cili shkruan se ku është një huq i kryeministrit, dhe do të ishte mirë që të kuptohej nga të gjithë ata që i shërbejnë verbërisht.
“E shiti Gjushin?!
Asnjë çudi.
Të gjithë do t’i shesë një e nga një, siç shiti ministrat e brendshëm dhe jo vetëm…
Kur i afrohet rreziku, shet cilindo, për të shpëtuar veten.
Bëjnë mirë ta mësojnë këtë huq të Tij, të gjithë ata që i shërbejnë verbërisht ende”, shkruan Manjani.
Çfarë deklaroi mbrëmë Rama për Dakon: Për sa i përket çështjes, unë them që çështja ka disa aspekte. Kam neveri nga përgjimet, jo nga përdorimi i përgjimeve sepse janë shumë të rrezikshme në aspektin e devijimit nga e vërteta sepse mund të nxirren nga e vërteta. Ka një aspekt edhe moral. Jemi në kushtet kur kryetari i bashkisë së Durrësit nuk është më kandidat. Është një person i lirë që duhet të përgjigjet deri në fund.
Përgjimet nuk janë prova, janë indice. Shikoj që ka një shëmti dhe më vjen për të vjellë kur dëgjoj biseda të caktuara. Ajo që është me rëndësi është se sa këto janë muhabete të materializuara me fakte dhe muhabete të njerëzve që bëjnë sikur zgjidhin çështjet në planet. Aspekti ligjor është një katastrofë nga pikëpamja e menaxhimit të këtij procesi. Është përgjegjësi e prokurorëve të ruajnë përgjimet.
Gjithë këta njerëz që i përkasin botës së krimit janë në burg. sa i përket aspektit politik ka diçka që askush nuk e thotë, por është diçka më problematikë…sepse unë besoj që kjo është një dosje e mbajtur në sirtar për shantazh politik dhe që lidhet me atë që unë e kam quajtur tërmeti i reformës në drejtësi në proces.
Këto copa materiale merren dhe nxirren që të ekspozohen në një gazetë me tirazh shumë të madh në Gjermani, duke sulmuar dy gjëra, e para duke i dhënë një kornizë të një zbulimi gjerman për të sugjestionuar shqiptarët këtu. Nga ana tjetër kjo ekspozohet në momentin kur ne presim nga Gjermania dhe vendet e tjera të marrim një dritë jeshile për negociatat. Natyrisht ky është një ushqim që helmon gjakun e shumë njerëzve këtu.
Kjo ka qenë një vendimmarrje në bashkëpunim me Vangjushin që i erdhi shpirti në majë të hundës për gjithë këtë situatë. Kemi bërë një vlerësim të të gjitha gjërave dhe vetë ai e ka pasur edhe këtë shqetësim sepse u bë tabelë qitje për diçka sipas tij është inskenim mbi bazë muhabetesh. Ka lidhje me një proces fushate në një zonë të caktuar ku këta njerëz që sot janë prapa hekurave kanë qenë historikisht në shërbim të Partisë Demokratike
(E.K/Faxweb.al)
Discussion about this post