Sot u mësua se Drejtori i Përgjithshëm i Hipotekës, Valdrin Pjetri, është zhvendosur në një detyrë tjetër, konkretisht ka marrë postin e Prefektit të Shkodrës.
Po përtej këtij lajmi që në fillim u fut në valën e lëvizjeve të forta që ndodhën në administratë, duket se ka një zhvillim tjetër më interesant.
Burime të besueshme pranë qeverisë, bëjnë të ditur se Valdrin Pjetri është më favoriti për Edi Ramën për të qënë kandidat për Bashkinë Shkodër, shkruan mapo. Eshtë kjo arsyeja që ai vendosi ta dërgojë në qytetin më të rëndësishëm të Veriut si Prefekt.
Në situatën kur ende nuk dihet se cfarë do të ndodhë me zgjedhjet vendore, Rama megjithatë për të krijuar edhe idenë e normalitetit ka shpallur deri tani disa emra për zgjedhjet lokale vendore, të dekretuara nga Presidenti për datën 30 qershor.
Emërimi në fillim prefekt, është një skemë tashmë e përdorur nga Rama edhe në rastin e Elbasanit. Pjetri vjen pas disa angazhimeve në administratë.
Ai ka qenë drejtor i rendësishëm në Ministrinë e Mbrojtjes, më pas prej më shumë se 1 viti në krye të hipotekave, tani mesa duket po bëhet gati për promovimin e madh, që është të qënit kandidat për Bashkinë e Shkodrës.
