Ndërkohë që ende nuk kemi një të dyshuar për ekzekutimin e avokatit Ravik Gurra, pavarësisht konstatimit të grupit hetimor se ekzekutimi i tij ka lidhje direkt me detyrën e tij si avokat, gazetarja e kronikës së zezë Klodiana Lala ka nxjerr në dukje disa fakte tronditëse.
E ftuar mbrëmjen e sotme në studion e Opinion, Lala është shprehur se përpara një viti e gjysmë avokati Gurra i ka shprehur një shqetësim një zyrtari të lartë të policisë.
Sipas Lalës, avokati kërcënohej nga disa persona dhe se ka patur detaje të sakta për ata të cilët e kërcënonin. Lala madje shprehet se avokati i ka patur të rregjistruara të gjitha kërcënimet në celular.
Për më tepër ajo thotë se: “Avokati para një viti e gjysmë ka shprehur një shqetësim pranë një zyrtari të lartë të policisë së Elbasanit, por e ka lënë në kuadrin miqësor. Ata që kanë pasur informacion, më kanë thënë se avokati ka dhënë detaje të sakta për ata që e kërcënonin. Ka pretendime që një pjesë të atyre kërcënimeve që konstatonte i ka renditur në një celular që nuk dihet se në duart e kujt është’’
