Policia e Shtetit nuk e ka aspak për problem që të nxjerrë me emër dhe me mbiemër të dënuar me disa muaj burg, që arrestohen prej tyre, ama tregohet shumë e rezervuar sa i takon emrave që janë subjekt i OFL-së.
Kështu në një nga dhjetra mesazhet rutinë, që iu dërgohen çdo ditë gazetarëve ishte dhe një njoftim nga ana e policisë në Vaun e Dejës, që deklaronte se kishte ndaluar një shtetas të shpallur në kërkim, i dënuar me 2 vite e 8 muaj burg, për fshehje të të ardhurave.
“Nga shërbimet e Komisariatit të Policisë Vau i Dejës, në bazë të informacioneve të marra në rrugë operative u bë kapja dhe ndalimi i shtetasit Latif Salja, 61 vjeç, banues në lagjen “Qemal Stafa”
Ndalimi i tij u bë, pasi Gjykata e Shkallës së Parë Shkodër, me vendimin nr. 312, datë 18.04.2017, e ka dënuar me 2 vjet e 8 muaj burg, për veprën penale “Fshehja e të ardhurave””, thuhej në njoftimin e policisë, ndërkohë që për Emiljano Shullazin dhe Gjergj Cukalin, policia mjaftohej vetëm me dhënien e inicialeve, dhe disa përshkrimeve shtesë për veprat penale, për të cilat akuzohen.
‘’OFL u ka dërguar kërkesat për vetëdeklarim të pasurisë shtetasve:
– E. Sh, me banim në Tiranë, i cili aktualisht ndodhet i paraburgosur, pasi ndaj tij po zhvillohet gjykimi për veprat penale “Shtrëngimi me anë të kanosjes ose dhunës për dhënien e pasurisë”, “Grup i strukturuar kriminal” dhe “Kryerja e veprave penale nga organizata kriminale dhe grupi i strukturuar kriminal”;
– Gj. C., me banim në Tiranë, pasi në vitin 2006, Gjykata e Rrethit Tiranë e ka dënuar me 10 vite burg, për veprën penale “Rrëmbimi ose mbajtja peng e personit”;
Këta individë, si subjekt i Ligjit Special, duhet t’u përgjigjen me shkrim, brenda 48 orësh, të gjitha pyetjeve të OFL-së”, deklaronte policia, që fatmirësisht falë të shkuarës së tyre të bujshme, u arritën të identifikoheshin lehtësisht nga ana e gazetarëve.
Sjellja me dy standarde nga ana e policisë lë shumë për të dëshiruar, veçanërisht për shkak të propagandës së shtuar, se po luftohen të fortët dhe pasuritë e tyre, ama emrin nuk ua zëmë dot në gojë.
(E.K/Faxweb.al)
