Ende pa e bërë zyrtar kandidimin, deputeti i PS-së nis pazarin e votave për të mposhtur Xhelal Mziun (Mesazhet flagrante)

Duket se puna për zgjedhjet lokale të muajit Qershor ka nisur në kampin e socialistëve, pse jo dhe duke ofruar vende pune kundrejt marrjes së votave.

Ende pa e zyrtarizuar kandidaturën e tij për Bashkinë e Kamzës deputeti Rakip Suli ka nisur kontaktet në privat. Kështu një mësues ka denoncuar në redaksinë e Faxweb një mesazh të dërguar nga Suli, që i premton një vend pune në Kamëz.

Ndër të tjera, deputeti Suli i shkruan mësuesit: “Doja t’ju uroja dhe shpresoj dhe besoj që ju jeni vendimtar në garën time në Kamëz bashkë me kolegët”.

Kur mësuesi e pyet se nga e di emrin e tij, deputeti thotë që emrin e ka marrë nga drejtoresha e zyrës arsimore: “Emrin tuaj ma dha Ermioni nga lista e mësuesve në Drejtorinë Arsimore”.

Më poshtë deputeti i thotë mësuesit “më kalo numrin tënd se do t’ia jap Kryetarit të PS-së në Kamëz”, duke i premtuar se nëse angazhohet në fushatë do marrë emërimin si mësues.

“Përshendetje, une kam një denoncim të forte dhe dua ta bej këtu te ju sepse këta legenat e Rilindjes mavi e kan fillu blerjen e votave qe tani me vende pune po ta harrojne Rakip Suli dhe Rilindja se ka me fitu. Une nuk e kam problem postojeni dhe emrin tim dhe cdo gje.

Jam Ervil Dervishi profesor fiskulture ne Kamez. Kam 1 vit qe jam shperngulur nga Pogradeci dhe kam filluar profesor fiskulture ( I jashtëm), por Emirion Cakoni nuk ma jep emerimin si profesor i brendeshem se do lekë”, thuhet në mesazhin e mësuesit dërguar në redaksinë e Faxweb.al.

Socialistët kanë kërkuar me çdo kusht që të fitojnë në zgjedhjet e Qershorit Bashkinë e Kamzës, dhe kanë tentuar që të eleminojnë nga gara dhe Xhelal Mziun, përmes mekanizmit që kryebashiakët që kanë tre mandate të mos lejohen që të kandidojnë. Kërkesë kjo që u hodh poshtë nga KQZ dhe është dërguar në Kolegjin Zgjedhor.

(E.K/FAXWEB.AL)