Një ditë më parë, Policia e Shtetit paralajmëroi marrje të masave, deri edhe burg për ata që do të shkelin ligjin gjatë protestës së planifikuar sot nga opozita.
Mëngjesin e sotëm, kryeministri Rama ka zgjedhur pikërisht punonjësit e Policisë së Shtetit për t’u thënë “Mirëmëngjes” shqiptarëve.
Duke i cilësuar “engjëj mbrojtës”, ai shpreh mirënjohjen dhe respektin për çdo punonjës që ka bërë të mundur kthimin e besimit të qytetarëve tek uniformat blu.
“MIRËMËNGJES
dhe ju uroj një ditë të mbarë me këtë imazh të një prej “engjëjve mbrojtës” të rregullit në rrugët e vendit.
Ermela Lika, pasi ka kryer me rezultate të shkëlqyera Akademinë e rilindur të Sigurisë është bërë pjesë e #PolicisëQëDuam bashkë me 888 gratë dhe vajzat me gradë, të cilat i janë bashkuar forcave të rendit tre vitet e fundit.
Mirënjohje dhe respekt për çdo punonjës të Policisë së Shtetit, që me përkushtimin dhe profesionalizimin e saj apo të tij, ka bërë të mundur kthimin e besimit të qytetarëve tek uniformat blu.
Shumë është bërë. Ende më shumë mbetet për t’u bërë. Por edhe shumë ka për të humbur nëse ndalemi sot. Prandaj përpara për #ShqipërinëQëDuam me #Shtet#Punë#Mirëqenie.”, shkruan Rama.
(XH.A/SHUPLAKA)
