Me vetëm 5 fjali Ergys Mërtiri bën skanerin e panairit të librit. Vërtetuar nga të gjithë ne që ishim të pranishëm, asgjë të re nuk pati në prurjet e shtëpive botuese.
”Prurjet e shtëpive botuese dëshmonin një varfëri trishtuese. Tituj kompercialë, libra best seller, botime të dobëta mbushnin kudo stendat, ndërsa turma njerëzish shëtisnin mes tyre, sa për të kryer ritualin e përvitshëm të pjesëmarrjes në atë që, mediat e kanë quajtur “festë e librit”. Natyrisht, nuk munguan fotot e rastit, të dëshmuara sigurisht online, në rrjetet sociale.
Në realitet, ky panair shërbeu vetëm si një supermarket ku shiten libra me ulje çmimi, në kurriz të librarive, të cilat, nga mungesa e lexuesit, kanë mbetur thuajse pa punë. Nga ky aspekt, panairi ishte në vetvete një selfie gjigande që, përveç vëmendies së mediave në një fundjavë pa lajme, nuk solli ndonjë vlerë për t’u shënuar në fushën e botimeve.”, analizon Mërtiri.
Duhet thënë se fokusi i këtij viti, ose së paku detaji që duhet lavdëruar ishin librat për fëmijë. Disa përkthime shumë të mira, botime të reja dhe larmishmëri më e madhe krahasuar me botimet për të rritur. (V.G/Faxweb)
