Të shumta kanë qenë reagimet pas nismës së kryeministrit Rama për miratimin e ligjit që kriminalizon shpifjen ku nuk ka munguar edhe ironia.
Pedagogu Erion Kristo ka deklaruar me ironi në “360 Gradë” se tani kryeministri do të bëjë ligj për kruajtjen e hundës.
“Qeveria ka hyrë tek fusha e edukimit për të ndryshuar mentalitetin e shqiptarëve. Pas kësaj, do të bëjë ligj për kruajtjen e hundës. Do nxjerrë një ligj që kush kruan hundën…Cili është problemi i shqiptarëve sot?
Po ikin për shkak të shpifjes?! Pse nuk del ligji për varfërinë, për ripopullimin e disa shkollave ndërkohë që ato mbyllen. Unë flas për kryeministri që viziton njerëzit e varfër që u thotë nuk e dija që ishin kaq keq. Pse nuk bën një ligj për të mbështetur intelektualët, autorin. Shqetësimet e kryeministrit nuk janë shqetësime reale të vendit.
Ka plot njerëz që e mbështesin idenë e kryeministrit për shpifjen. Nisma e tij kthehet kundër institucioneve të pavarura. Kryeministrit i dridhet buza për kuksianët dhe brenda natës Prokuroria shkel ligjin dhe arreston brenda natës kuksianët. Pra deklarimet e kryeministrit konkretizohen nga institucionet. Ka rreth 40 mijë dosje të pa shqyrtuara në gjykata, të gjitha do të lihen sepse tani ushtria e qeveritarëve, e njerëzve që i kanë duart në tavë, do t’u ndërsehen të gjithë njerëzve që i kanë fyer”, tha ai. (B.H/Faxweb)
Discussion about this post