Kryetari i Partisë Demokratike Lulzim Basha ka reaguar pas komunikimit javor të kryeministrit Edi Rama, i cili ndër të tjera foli edhe për faljen e kamatëvonesave të energjisë elektrike për pensionistët.
Sipas kryedemokratit Rama gënjeu pasi “në vitin 2014 deklaroi se 98% e pensionistëve paguajnë rregullisht energjinë elektrike, ndërsa sot tha se mbi 66 mijë pensionistë nuk e përballojnë dot faturën e dritave”.
Postimi i plotë i Lulzim Bashës:
Edi Rama më në fund pranon dëmin e madh që u bëri shqiptarëve në nevojë me terrorin 3vjecar ndaj të varfërve që nuk paguanin dot dritat.
Ai sot lajmeroi se do të falë kamatvonesat, që është më minimalja që i kemi kërkuar të gjithë prej të paktën dy vitesh.
Kjo është gjë e mirë për shumë familje në nevojë, sidomos tani që çmimi i dritave është rritur dhe fuqia blerëse e cdo familje shqiptare ka rënë.
Fatkeqësisht, falja vjen tepër vonë për Qamil Zelën që u vetvra si pasojë e burgosjes së padrejtë për dritat e papaguara, për Arif Dodën dhe Llazar Nasin që u vetëvrane nga depresioni pasi OSHEE i shkëputi dritat, per 35 vjecaren Resmie Alla qe vdiq duke rilidhur energjine per vogelushet e saj azmatike, per Barbulla Pepen qe vdiq nga i ftohti pasi OSHEE i shkeputi per 2 muaj energjine ne mes te acarit dhe per mijera të tjerë që kaluan drama dhe tronditje psikologjike nga dhuna shtetërore ndaj tyre për më shumë se tre vjet.
Shqiptarët duhet t’i jenë mirënjohës faktit se po afrojnë zgjedhjet dhe tani që Edi Rama ka nevojë për votat e njerezve do përpiqet t’u hedhë edhe atyre ndonjë qoke të vogël, pasi tre vjet në pushtet ka menduar vetëm për pasuritë e tij dhe klientëve të tij duke grabitur paratë e qytetarëve.
Falja e detyroi Kryeministrin që të nxjerrë veten gënjeshtar: në nëntor 2014 ai pati deklaruar se 98 për qind e pensionistëve dhe 93 për qind e personave me aftësi të kufizuar e paguanin rregullisht energjinë elektrike. Sot ai u detyrua te pranoje se janë të paktën 67 mijë familje pensionistësh që nuk përballojnë dot pagesat në kohë, të energjisë dhe janë gjobitur me kamatvonesa.
Megjithatë më mirë vonë se kurrë. (A.R/SHUPLAKA)
