Përfaqësuesi i Fondit Monetar Ndërkombëtar për Shqipërinë, Jens Reinke, i bën thirrje opozitës të kthehet në Parlament.
Në një prononcim për “Top Channel”, Reinke thotë se zbatimi i Reformës në Drejtësi është shumë i rëndësishëm për ekonominë, prandaj edhe ai i drejton këtë mesazh opozitës.
“Bordi i drejtorëve në Uashington theksoi se zbatimi i suksesshëm i reformës në drejtësi është shumë i rëndësishëm për ekonominë. Për këtë arsye ne u bëjmë thirrje të gjithë aktorëve politikë, përfshirë opozitën, të angazhohen në mënyrë më konstruktive dhe të bëjnë detyrën që duhet bërë në Parlament, sepse reforma në drejtësi nuk mund të kalojë kur njerezit janë në rrugë, duke u ulur në një tendë të bardhë”, shprehet Reinken.
Këto deklarata nga FMN duken të habitshme, pasi është hera e parë që kjo organizatë ndërhyn në çështjet tona politike. Megjithatë, Reinke sqaron se që ekonomia të funksionojë sa më mirë, duhet që e njëjta gjë të ndodhë edhe me gjyqësorin.
“Sundimi i ligjit është ndoshta pengesa më e madhe për rritjen ekonomike dhe konkurrueshmërinë e ekonomisë shqiptare. Pra, ka nevojë për sigurinë e pronës, zbatimin e kontratave dhe për më shumë parashikueshmëri. Të gjitha këto kërkojnë që gjyqësori të jetë më efektiv në mënyrë që investitorët dhe publiku të sigurohen se korrupsioni nuk do të luajë rol domethenës”, thotë përfaqësuesi i Fondit në Shqipëri.
Ndër të tjera, Reinke thotë se zvarritja e reformave rrit edhe faturën për Shqipërinë. (D.D/Shuplaka)
